Premios para os mellores traballos redactados en galego

A Universidade de Santiago pecha o 30 de setembro o prazo para presentar traballos de fin de grao e de fin de mestrado aos Premios á calidade lingüística. O certame recoñece os mellores traballos académicos do curso 2013-2014. A iniciativa, que conta co apoio económico da Secretaría Xeral de Política Lingüística, diríxese ao alumnado de todos os centros e titulacións da USC que elabore os seus proxectos en galego e obteña cando menos a cualificación de aprobado. Concederanse cinco premios, un por cada grande área de coñecemento, de 300 euros para os traballos de fin de carreira e de fin de grao e 400 para os mellores de fin de mestrado. En todos os casos reciben ademais un diploma para o seu currículo. Recursos de apoio

No web das bases do certame o alumnado poderá atopar recursos de apoio para mellorar a calidade dos seus traballos académicos, como léxicos e vocabularios, recomendacións de estilo académico ou a base de datos terminolóxica multilingüe bUSCatermos, con máis de 100.000 entradas.