Presentación do libro Álbum de visitas da Facultade de Medicina de Santiago 1933-2016

O libro Álbum de visitas da Facultade de Medicina de Santiago 1933-2016 presentarase estes xoves 22 ás 20.00 horas no Salón Nobre do Colexio de Fonseca. Na presentación intervirán o reitor Juan Viaño; o presidente da Xunta de Galicia, Alberto Núñez Feijóo; o decano da Facultade de Medicina, Juan Gestal; o historiador Ricardo Gurriarán Rodríguez; e o editor de Bolanda, Antonio Couto Rego.

A obra recolle a testemuña dun importante número de personalidades académicas e científicas que deixaron constancia do seu paso pola Facultade compostelá. Entre outras o volume reproduce as palabras de Antonio Egas Moniz, André Frèderic Cournand ou Andrew Victor Schally, todos eles recoñecidos co premio Nobel, así como de Severo Ochoa, en dúas ocasións. Tamén figuran, entre outros, Teófilo Hernando Ortega, pai da farmacoloxía moderna; o doutor Christiaan Barnard, que realizou o primeiro transplante de corazón, ou Vincent Meininger que traballou nos tratamentos da esclerose lateral amiotrófica (ELA).