Presentación do simposio ibérico ‘Agroecoloxía, municipalismo e desenvolvemento rural’, que comeza o venres 12 na Politécnica

O vicepresidente da Sociedade Española de Agricultura Ecolóxica (SEAE) e profesor na Escola Politécnica Superior da USC, Xan Neira Seijo, presentará o vindeiro martes, día 9 de decembro, a partir das 11.00 horas, no salón de actos do Pazo de San Marcos de Lugo, a primeira edición do simposio ibérico ‘Agroecoloxía, municipalismo e desenvolvemento rural’, un foro aberto que pretende servir de encontro, debate e posta en común de experiencias de vangarda en materia de municipalismo, desenvolvemento rural e transición agroecolóxica.

A deputada delegada da área de Medio Ambiente e Enerxías Renovables da Deputación Provincial de Lugo, Sonsoles López Izquierdo, tamén intervirá no acto de presentación deste primeiro simposio ibérico, cuxas sesións e debate permitirán a posterior elaboración dun documento con recomendacións sobre agroecoloxía, municipalismo e desenvolvemento rural.