Presentan en Santiago os últimos resultados do proxecto SIESTA de determinación de indicadores espaciais para a Estratexia Europa 2020

Os participantes no proxecto europeo SIESTA -Indicadores espaciais para unha Estratexia Europa 2020; Análise Territorial-desenvolven o vindeiro xoves 31 en Santiago un seminario para dar a coñecer os seus principais resultados. SIESTA está financiado pola Unión Europea no marco de ESPON, a Rede de Observación Europea de Desenvolvemento Territorial e Cohesión. Liderado pola Universidade de Santiago de Compostela con Rubén Lois como director, involucra a outros sete socios académicos e de investigación de seis países diferentes de Europa: Francia, Grecia, Irlanda, Italia, Polonia e Romanía. O principal obxectivo do programa ESPON é apoiar o desenvolvemento de políticas en relación coa cohesión territorial e o desenvolvemento harmonioso do territorio europeo. En concreto, busca proporcionar datos evidentes sobre o territorio para a identificación de oportunidades para os diferentes tipos das rexións en relación cos obxectivos e as iniciativas emblemáticas que figuran na Estratexia europea. Trátase, en definitiva, de que os resultados sexan útiles para quen formule políticas en diversas escalas (especialmente no ámbito rexional e local) no proceso de planificación e identificación de intervencións territoriais.