Preséntase en Lugo a XVIII edición do Maratón Fotográfico do Campus

Dentro das actividades do programa Lugo Cultural para o ano 2012, a Área de Cultura da USC no Campus de Lugo presenta a XVIII edición do Maratón Fotográfico do Campus, cuxa celebración terá lugar o próximo día 30 de outubro. O Maratón Fotográfico configura unha das actividades máis consolidadas e con maior éxito das que se promoven desde o programa Lugo Cultural, do que forman parte, ademais da USC, o Concello de Lugo, a Deputación Provincial de Lugo e a Xunta de Galicia. Para esta actividade cóntase tamén coa colaboración do grupo cinematográfico lucense Fonmiñá. Á rolda de prensa de presentación desta décimo oitava edición asistirán o vicerreitor de Coordinación e Planificación do Campus de Lugo, Pedro García Herradón; o responsable de Cultura do Concello de Lugo, Antón Bao; a xefa do Servizo de Patrimonio da Xunta de Galicia en Lugo, Ana Carril; e os fotógrafos lucenses Eduardo Ochoa e Carlos Valcárcel. Fotógrafos máis ou menos profesionais ou afeccionados de dentro e fóra da comunidade universitaria toman parte nesta iniciativa, que ten como finalidade buscar durante unha xornada a imaxe que mellor resuma os temas propostos pola organización. Na edición de 2011 inscribíronse arredor de 40 participantes.