Preto de 250 persoas asistirán en Lugo a unhas xornadas veterinarias sobre neuroloxía e coidados intensivos
Preto de duascentas cincuenta persoas, principalmente estudantes e licenciados en Veterinaria chegados de diferentes puntos de Galicia, Andalucía, Valencia e Portugal, asistirán á primeira edición das ‘Xornadas en Medicina Veterinaria: neuroloxía e coidados intensivos’, que se desenvolverán no Auditorio da Facultade de Veterinaria de Lugo dende este venres 7 ata o domingo 9.
A inauguración oficial das xornadas será o venres ás 15:30 horas e contará coa presenza do vicerreitor de Coordinación do Campus de Lugo, Carlos Herrero; o presidente da Sociedade Española de Medicina Interna Veterinaria (SEMIV), Ángel Javier Alonso; o profesor do Departamento de Ciencias Clínicas Veterinarias da USC, Luciano Espino; o vicedecano de Organización Académica e Calidade da Facultade de Veterinaria, Germán Santamarina; e o presidente da Deputación Provincial, José Ramón Gómez Besteiro.
O Departamento de Ciencias Clínicas Veterinarias da USC e a Sociedade Española de Medicina Interna organizan conxuntamente esta actividade co obxectivo de que os asistentes poidan actualizar e revisar os seus coñecementos en dúas das especialidades veterinarias con máis desenvolvemento nos últimos anos, a neuroloxía e os coidados intensivos.
Relatores de prestixio internacionalOs relatorios destas primeiras Xornadas en Medicina Veterinaria correrán a cargo de tres profesionais españois que desenvolven a súa labor en centros de recoñecido prestixio internacional. Trátase de Raquel Frances-Borrell e Lluis Gaitero Santos, do Hospital Veterinario da Facultade de Ontario (Canadá), e Sergio Ródenas González, membro dos Especialistas veterinarios dos condados do sur de Inglaterra.
Nas súas intervencións, que rematarán o domingo 9 ás 14:00 horas, abordarán temáticas como o manexo e tratamento con monitores do paciente hospitalizado, os diferentes casos de convulsións e estados epilépticos en animais, doenzas e trastornos como traumatismos cranial ou espiñal, as afeccións do sistema nervioso periférico, o síndrome vestibular, a enfermidade discal aguda ou diferentes doenzas inflamatorias.