Preto de 7.000 universitarios participaron nos programas de mobilidade da USC desde o curso 2004/2005

Un total de 6.756 estudantes participaron nos últimos catro anos nos distintos programas de mobilidade da USC, tanto do Sócrates/Erasmus como de convenios bilateriais. A universidade compostelá enviou a distintos países de Europa e do mundo 2.439 universitarios e recibiu 4.317 nos seus diferentes centros e titulacións de Santiago e Lugo.
Así o confirman os datos presentados este martes en Santiago polo vicerreitor de Relacións Exteriores, Lourenzo Fernández Prieto, e o coordinador de Relacións Exteriores, Francisco J. Sanjiao Otero, e referidos ao período 2004-2008.
O informe revela que a evolución dos programas de intercambio Erasmus e bilateriais (Programa Xan de Forcados) foi moi positiva desde o curso 2004-2005 ata o 2007-2008, pasando de 935 estudantes recibidos no primeiro destes a 1.195 no 2007-2008; e de 521 a máis de 600 estudantes da USC que foron a universidades doutros países de Europa e do mundo.
Nestes catro anos os estudantes internacionais foron un 5,98% da matrícula da USC no Campus de Santiago e o 1,52% no de Lugo. O de Santiago está neste caso moi por enriba da media das universidades españolas, mentres que o de Lugo se sitúa xusto na media.
ErasmusDo programa Erasmus recibíronse 2.641 estudantes, formando as mulleres unha considerable maioría darredor do 71 por cento. Italia, Alemaña, Francia, Portugal, Polonia, Reino Unido e República Checa foron os países dos que máis universitarios chegaron á USC, pero tamén se matricularon estudantes de Grecia, Bulgaria, Malta e Turquía.
Os centros que máis alumnos recibiron neste período foron Filoloxía, Ciencias Económicas e Empresariais, Ciencias Políticas e Sociais, Xeografía e Historia, Ciencias da Educación, Medicina e Odontoloxía, Ciencias da Comunicación, Farmacia, Dereito, Psicoloxía, ETS Enxeñería, no Campus de Santiago; e Veterinaria, EPS e Humanidades no Campus de Lugo.
Dos 1.834 estudantes da USC que foron de Erasmus neste período 2004-2008, 509 desprazáronse a universidades de Italia e o resto a países de toda Europa, desde Portugal, Reino Unido, Francia Alemaña e Polonia ata Eslovenia ou Turquía. Neste caso, o centro que máis estudantes enviou foi a Facultade de Ciencias Económicas e Empresariais. Despois, Filoloxía, Ciencias Politicas, Farmacia, Medicina e Odontoloxía e a EPS de Lugo. Tamén neste caso as mulleres forman unha porcentaxe lixeiramente inferior ás que viñeron estudar á USC, aproximadamente as tres cuartas partes da mobilidade.
Convenios bilateriaisDesde 2004 rexistrouse un incremento do 59 por cento no fluxo de acollida de estudantes por convenios bilateriais. En total, nestes catro anos a USC recibiu 1.242 universitarios procedentes maioritariamente de México e Brasil, aínda que tamén de Chile, Arxentina, Estados Unidos, Corea do Sur, Perú, Colombia, Australia, Xapón, Canadá, e outros países como Suíza, Mozambique ou Porto Rico.
O centro que máis alumnos recibiu foi a Facultade de Económicas e Empresariais (237), Dereito (235), Psicoloxía (116), Ciencias da Comunicación (78), Filoloxía (75) e Ciencias Políticas (58). No Campus de Lugo, a Facultade de Ciencias, a EPS, Humanidades e Veterinaria foron os centros que recibiron máis alumnos internacionais a través destes convenios.
Da USC marcharon a estudar a outras universidades a través de convenios bilaterais un total de douscentos estudantes. No primeiro curso deste período, foron só 32 e no último, 2007-2008, arredor de 50. As universidades de Brasil, Arxentina e México son as que recolleron un maior número, aínda que tamén houbo alumnos galegos en Cuba, Chile, Canadá, Estados Unidos, Xapón, Australia e Perú, entre outros.
A EPS de Lugo é o centro da USC con máis universitarios estudando noutras universidades a través destes convenios (42), seguida da Facultade de Ciencias Económicas e Empresarias (33) e Dereito (27).
Os datos demostran que a USC é unha universidade internacional e, como manifestou Lourenzo fernández, “o fomento da mobilidade é unha vía de captación de estudantes imprescindible para o futuro”. “Somos -afirmou- unha universidade con moita capacidade formativa e investigadora que non poderá xustificarse cunha demanda exclusivamente local ou nacional nos anos vindeiros”. O futuro da USC –engade- “xógase en boa medida na capacidade de deseñar unha estratexia internacionalización horizontal para estar entre as 100 primeiras universidades europeas en todos os indicadores”.