Preto dunha vintena de estudantes da USC, seleccionados no ránking 2021 da Sociedade Española de Excelencia Académica
A Sociedade Española de Excelencia Académica (Sedea) seleccionou a dezasete estudantes da USC na súa clasificación estatal correspondente a 2021. Ademais, tres deles sitúanse entre os tres primeiros postos das súas respectivas titulacións. Así, Irea Mosquera Lois ocupa o primeiro chanzo en Química, dun total de 25 posicións; Iván Gómez Álvarez é segundo en Veterinaria, dun total de 10 postos; mentres que Joaquín Vila García é terceiro en Medicina, nunha clasificación que abrangue 40 posicións.
O resto de persoas seleccionadas por parte da USC foron Francisco Javier Cardama Santiago (posto 20 dun total de 70 chanzos en Enxeñaría Informática), Álvaro Goldar Dieste (posición 9 de 70, tamén en Enxeñaría Informática), Matías Rodríguez Rodríguez (posto 47 de 60 en Dereito), Andrea Rodríguez García (chanzo 39 de 40 en Psicoloxía), Álvaro Muñiz Brea (posto 4 de 15 en Matemáticas), Antía Fernández López (chanzo 12 de 45 en Mestre/a en Educación Primaria), Marcos Álvarez Espiño (posición 15 dun total de 60 en Administración e Dirección de Empresas), David Alonso Prol (21 de 35 en Economía e Empresa), Nerea Abalde González (26 de 40 en Psicoloxía), Nerea Romero Díaz (6 de 30 en Enxeñaría Civil e Obras Públicas), Silvia Gómez Anca (13 de 40 en Medicina), Juan Manuel Prieto Arosa (7 de 30 en Xornalismo), Raquel Díaz Argueso (35 de 60 en Dereito) e Raquel Lorenzo Alonso (11 de 35 en Economía e Empresa). O número de candidatos seleccionados de cada titulación correspóndese aproximadamente co 1-2% de egresados anualmente en cada unha delas.
Metodoloxía
As persoas interesadas en aparecer nesta clasificación deben finalizar os seus estudos cunha nota media superior a 8 (ou superior a 7 para Enxeñarías e Arquitectura). Ademais, teñen que rexistrarse na web de Sedea e achegar o seu expediente académico, currículo e acreditar os méritos (bolsas, premios, cursos, idiomas, congresos, formación complementaria, liderado ou acción social). As candidaturas son valoradas polo Comité de Avaliación Sedea coa colaboración de recoñecidos expertos.
Sedea é unha entidade de ámbito estatal cuxa misión principal é identificar e acreditar os mellores graduados de España, poñéndoos en valor e contribuíndo dende múltiples enfoques ao seu éxito laboral.