O profesor de Dereito Administrativo Luís Míguez Macho elixido novo decano da Facultade de Dereito

O profesor de Dereito Administrativo Luís Míguez Macho resultou elixido decano da Facultade de Dereito na Xunta Extraordinaria de centro celebrada este venres 9. O profesor Míguez Macho obtivo 47 votos a favor, 8 en branco e 3 nulos.
Un dos principais retos que asume o profesor Luís Míguez Macho para os vindeiros anos será a adaptación do plan de estudos da Licenciatura de Dereito aos requirimentos derivados do desenvolvemento do Espazo Europeo de Educación Superior. Con anterioridade a ocupar o decanato do centro compostelán, Míguez Macho fora tamén secretario da Facultade de Dereito do Campus de Ourense. As súas liñas de investigación céntranse no estudo dos servizos públicos, a contratación administrativa e o dereito local.