O profesor da USC Luis Sobrado presenta o libro 'Avaliación da calidade e innovación dos centros educativos'

O catedrático de Diagnóstico e Orientación Educativa e Profesional da USC, Luis Sobrado Fernández, presenta este venres, 23 de maio, o seu libro Avaliación da calidade e innovación dos centros educativos, froito do traballo dun amplo grupo de profesores e investigadores que estuda a avaliación da efectividade educativa en corenta centros escolares galegos. O libro presentarase ás 11:00 horas na Aula Sarmiento da Facultade de Ciencias da Educación (Campus Sur).
O labor de investigación que deu lugar á publicación posibilitou o coñecemento do rendemento académico do alumnado de 4º e 6º curso de Ensino Primario e 2º e 4º do Ensino Secundario Obrigatorio (ESO) nas materias de Lingua, matemáticas e Ciencias da Natureza, así como a avaliación das súas habilidades metacognitivas de aprendizaxe escolar. En total, a mostra foi de preto de 2.000 estudantes.