O programa Explorer premia na USC a revista audiovisual lifestyle A Cousa e o dispositivo virtual de IA Peral Project
O programa de emprendemento universitario USC Explorer, promovido polo Santander e organizado desde a Área de Valorización, Transferencia e Emprendemento da institución académica, premiou na súa última edición o proxecto Lifestyle, unha proposta xerminada en Compostela que se concretaría na edición dunha revista audiovisual para a xeración Z con difusión a través das Redes Sociais, e o dispositivo Peral Project, que facilita técnicas de IA e visión artificial para a industria alimentaria ao tempo que cumpre funcións de asistente virtual.
Os comités encargados de resolver a última convocatoria de ideas empresariais innovadoras xurdidas ao abeiro do programa USC-Explorer, no que tomaron parte 15 equipos (7 en Santiago e 8 en Lugo) fixeron pública a súa decisión tralas sesións de presentación das propostas celebradas no Espazo Explorer do Edificio Emprendia de Compostela e na Facultade de Administración e Dirección de Empresas do Campus de Lugo.
O xurado encargado de determinar as propostas gañadoras entre as sete presentadas en Compostela estivo formado polo director da Área de Valorización, Transferencia e Emprendemento da USC, José Luis Villaverde; José Martínez Casal, en representación da Dirección xeral de Emprego, Traballo Autónomo e Economía Social da Xunta de Galicia, e polo director Oficina Banco Santander Campus Sur USC, Óscar Castro Campos. Logo de asistir á presentación das distintas iniciativas emprendedoras e tras escoller a gañadora, o tribunal tamén acordou distinguir co segundo premio a proposta de consultora de recursos humanos MA&T. O terceiro galardón recaeu en Fishealab, unha idea de negocio orientada a aportar solucións para a saúde en acuicultura e que xa conta cun primeiro desenvolvemento de vacinas fronte á pasteurelose.
Campus de Lugo
O decano da Facultade de Administración e Dirección de Empresas do Campus de Lugo, Roberto Bande Ramudo, e a delegada do reitor para o Campus Terra, a profesora Elvira López Mosquera, actuaron como anfitrións da sesión de presentación dos 8 proxectos emprendedores finalistas deste edición do programa Explorer. O director da Área de Valorización, Transferencia e Emprendemento da USC, José Luis Villaverde; José Martínez Casal, en representación da Dirección xeral de Emprego, Traballo Autónomo e Economía Social da Xunta de Galicia; o director da oficina do Santander no Campus de Lugo, Alejandro Álvarez; o director de Actividades en Lug Open Factory, Xosé L. Garza Silvela; o CEO de Innogando S.L., Elio López, e o cofundador e CEO de Aleutos Solutions S.L. José Luis Gude Pereira, completaron a relación de integrantes dun tribunal que logo de proclamar gañadora a proposta Peral Project, tamén distinguiu co segundo e terceiro premio, respectivamente, os proxectos LivDesignia, unha proposta que se concreta nun estudo creativo de deseño de produto, marca e comunicación dixital que axuda a emprendedores y empresas en vías de desenvolvemento, e unha clínica de dietética e nutrición accesible especializada en nutrición clínica, hormonal e deportiva.
