Reabre o estadio de atletismo
O estadio de atletismo reabre as súas portas dende este xoves 11 de xuño. A través da páxina web do Servizo de Deportes poden realizarse as correspondentes reservas de uso, o cal estará suxeito a estritas medidas de seguridade en base ás recomendacións das autoridades sanitarias.
Tal e como establece o plan de reinicio de actividade, só se poderá facer uso da pista de atletismo e os espazos anexos exteriores para adestramento de atletismo e acondicionamento físico individual. Os aseos están dispoñibles pero non os vestiarios. Os membros da comunidade universitaria da USC, así como atletas con licenza federativa maiores de 14 anos, poderán beneficiarse destas instalacións. É imprescindible estar rexistrado como persoa usuaria do Servizo de Deportes. Ademais, os atletas federados deberán adquirir o ‘Abono federados’ que é gratuíto e só implica a xustificación desta condición achegando a licenza federativa.
Tempo de uso e horarios
A reserva de uso farase para unha franxa de duración máxima dunha hora e corenta e cinco minutos. Só se pode estar na instalación dentro da franxa horaria, así que esta inclúe tanto o tempo de acceso e preparación coma o de recollida de material e saída. A franxa de uso abrangue de 09.30 a 11.15 horas; de 11.45 a 13.30 horas; de 16.30 a 18.15; e de 18.45 a 20.30 horas.
Pistas de tenis e sendeirismo
As pistas de tenis da USC xa están tamén abertas ao público de luns a venres en horario de 10.00 a 22.00 horas. As persoas usuarias accederán ás pistas 1 e 2 pola porta lateral, respectando a distancia social, e depositarán os seus aveños na esquina que se corresponde coa parte máis alta do peche perimétrico do seu campo, xa que os vestiarios-aseos permanecerán pechados. Para as pistas 3 e 4, a entrada realizarase pola porta de acceso correspondente e seguindo idénticas pautas. Tanto as reservas como a adquisición de abonos de 10 usos farase en liña.
O Servizo de Deportes está tamén a traballar no reinicio da actividade de sendeirismo, en base ás directrices marcadas pola USC e os organismos con competencias na materia. Neste senso, xa hai diferentes rutas programadas e adaptadas ás condicións de mobilidade fixadas en cada momento polas autoridades sanitarias.