Dende a reforma da pista, o Complexo Deportivo do Estadio da USC intensificou o volume de eventos federativos acubillados
Control de marcas, campionatos federados, actividades escolares e iniciativas do programa Xogade ou concentracións son algúns dos exemplos das máis de trinta actividades alleas á actividade universitaria acubilladas pola pista de atletismo da USC dende a súa reforma e homologación a comezos de 2023. Un encontro celebrado na Reitoría entre o reitor da USC, Antonio López Díaz, e o presidente da Federación Galega de Atletismo, Iván Sanmartín, xunto co delegado do reitor para o Deporte, Javier Rico, serviu para facer repaso do desenvolvemento do convenio que a USC mantén co organismo federativo.
O total de actividades extra universitarias desenvolvidas nas instalacións do Complexo Deportivo do Estadio Universitario sumou máis de 6.000 deportistas e unha afluencia de milleiros de espectadores/as. A este tipo de actividades hai que sumar o servizo que as instalacións achegan para o desenvolvemento das propias actividades da institución universitaria. En total, neste curso 24/25 rexistráronse arredor de 60.000 entradas á instalacións, o que pon de manifesto a intensidade de uso que rexistra.
Como indicou Iván Sanmartín, a pista de atletismo da USC “é unha instalación esencial para a nosa modalidade deportiva, tanto polo seu emprazamento xeográfico central na xeografía galega como polo propio perfil das instalacións”. Como se puxo de manifesto no encontro na Reitoría da USC, para o óptimo aproveitamento da súa capacidade resulta preciso avanzar na súa reforma integral, particularmente no relativo ao mantemento da grada cuberta. Neste senso como indicou o reitor, a USC asumiu unha reforma parcial das instalacións para poder dar servizo no día a día da instalación e tamén albergar eventos de ata 350 espectadores/as. Non obstante, á vista do volume de actividades e afluencia de público, “é preciso unha reforma integral se o tecido deportivo atlético, a federación galega e as institucións queren que este Complexo albergue eventos deportivos con público”, engadiu o delegado Javier Rico.
Nos últimos anos, a USC ten desenvolvido un esforzo importante por abrir as súas instalacións e servizos deportivos á cidadanía e á contorna deportiva, máis alá do uso restrinxido para a comunidade universitaria. A finalidade é reafirmar a súa vontade de facer dos seus espazos un punto de convivencia que sirva de utilidade á veciñanza e á comunidade deportiva de Compostela e de Galicia.
O acordo
En virtude do acordo de colaboración que manteñen vixente a USC e a Federación Galega de Atletismo, a entidade deportiva comprométese a colaborar na organización de actividades de atletismo na USC a asesorar na programación deportiva.
Pola súa banda, a USC cede o seu complexo deportivo para competicións e actividades organizadas pola federación así como espazos da área deportiva para gardar material, ademais de facilitar o acceso gratuíto á pista de atletismo a dez atletas en cada tempada elixidos pola propia federación.
