O reitor Juan Casares inaugura o Museo do Templo de Mitra na Casa do Saber do campus de Lugo
O reitor da Universidade de Santiago de Compostela, Juan Casares, presidiu este martes a inauguración oficial do Museo do Templo de Mitra, que acubilla o xacemento romano achado no solar anexo á Vicerreitoría de Coordinación e Planificación do campus de Lugo, no transcurso dun acto celebrado no auditorio da Casa do Saber de Lugo, e na que tamén participaron o alcalde de Lugo, José López Orozco; o conselleiro de Cultura e Educación da Xunta de Galicia, Xesús Vázquez Abad, e o subdelegado do Goberno en Lugo, Ramón Carballo.
O arqueólogo Celso Rodríguez Cao, que dirixiu as escavacións feitas no devandito solar e que permitiron o achádego deste xacemento, que achega información relevante sobre a primitiva configuración espacial da cidade de Lugo ademais de aportar non poucos datos sobre as formas de vida e as crenzas da época, guiou unha visita guiada pola Domus do Mitreo, un percorrido pola historia da cidade de Lugo aberto á participación da nutrida comitiva de autoridades políticas locais, provinciais e autonómicas, así como aos responsables académicas e culturais presentes no acto. A inauguración do Museo do Templo de Mitra constitúe o colofón a un dilatado proxecto que comezou a xestarse a finais da década dos anos noventa do pasado século XX, logo de que a Universidade de Santiago adquirira en 1998 o Pazo de Montenegro para, unha vez rehabilitado e acondicionado, establecer nas súas dependencias a Casa do Saber. Esta actuación deu pé a unha posterior intervención arqueolóxica sobre un espazo de máis de 600 metros cadrados, logo dunha fase de sondaxe previa que deu resultados positivos. A escavación, feita e dirixida polo arqueólogo Celso Rodríguez Cao, permitiu sacar a luz as primeiras evidencias que demostraron unha ocupación deste espazo e das súas inmediación desde época Alto Imperial (27 a.C-284 d.C.). Ao pouco de comezar os traballos apareceron os primeiros signos do trazado dunha gran Domus, conformada por una planta baixa, un patio enlousado e un primeiro piso. A esta estrutura temperá e primixenia uniríase xa en época Baixo Imperial (284 d.C- 476 d.C) unha serie de “ámbitos privados” acordes co estatus do señor da casa, un Centurión que aparece relacionado coa construción dun novo edificio anexo á domus e identificado por Celso R. Cao como un mitrhaeum ou mitreo, lugar de culto dedicado ao deus Mitra. Este edificio de culto, ten unha orientación de Norte/Sur e presenta una estrutura sinxela consistente nun espazo rectangular conformado por unha nave central bordeada lateralmente por cinco pilastras. No seu interior, atopáronse anacos dunh estatua de bronce e unha ara dedicada ao deus Mitra, cuxa transcrición é: “Ao nunca conquistado deus Mitra, G. Victorius Victorinus, centurión da Legión VII Gémina Antoniana, Devoto e Leal, con moito gusto, erixiu esta area na honra do posto de control militar de Lucus (Augusti) e dos seus libertos Victorius Secundos e Victorius Víctor”. Segundo os datos dos estudos xa realizados, a Domus do Mitreo é un dos poucos monumentos mitraicos achados en España que poden ser datados con fiabilidade no século III despois de Cristo e que mantén a súa funcionalidade un século despois.