O reitor da USC, designado tesoureiro da Rede internacional Columbus

O reitor da Universidade de Santiago, Senén Barro, acaba de ser designado tesoureiro da Rede Columbus, programa de cooperación universitaria entre institucións de educación superior europeas e latinoamericanas creado en 1987.
O nomeamento produciuse a finais deste pasado mes de marzo no transcurso da última xuntanza celebrada pola Xunta Directiva da Rede, da que era integrante. No marco deste programa de cooperación internacional o reitor compostelán está a traballar no desenvolvemento dun Forum Euro-Latinoamericano de promoción do desenvolvemento rexional baseado na innovación.
O obxectivo principal de Columbus é a promoción do desenvolvemento institucional e a cooperación multilateral para axudar ás universidades a responder aos desafíos relacionados coa escasez de recursos, a masificación, as demandas de diversificación ou a internacionalización. Nesta rede están implicadas máis de medio cento de institucións universitarias de Alemaña, Arxentina, Bélxica, Brasil, Chile, Colombia, Costa Rica, España, Francia, Italia, México, Países Baixos, Perú, Portugal e Venezuela.