Remata o prazo para inscribirse na carreira 'Dez quilómetros universitarios da USC-Campus de Lugo'

Este martes 25 pecha o prazo para inscribirse na carreira ‘Dez quilómetros universitarios da USC-Campus de Lugo’ que se celebrará por primeira vez na capital luguesa o vindeiro domingo día 30.
As persoas que desexen participar poden formalizar a súa inscrición ata as 14:00 horas deste martes a través da páxina www.championchipnorte.com. O prezo é de tres euros para os membros da comunidade universitaria e de cinco para o resto dos participantes.
Este evento deportivo, organizado polo Servizo de Deportes da USC no campus lugués en colaboración co Concello de Lugo e a Deputación Provincial, encádrase na Liga Universitaria de carreiras en ruta de dez quilómetros que este ano xa celebrou probas nos campus de Vigo e Ferrol.
A carreira desenvolverase a partir das 12:00 horas do domingo nas inmediacións do recinto feiral e do Parque do Miño, onde atletas e afeccionados terán que dar tres voltas a un circuíto de herba, asfalto e terra ata completar os dez mil metros da proba.