Rematada a primeira fase do proceso de adscrición e renovación de investigadores no IDEGA
O Instituto de Estudos e Desenvolvemento de Galicia (IDEGA), creado na Universidade de Santiago de Compostela a finais dos 1970 para impulsar as investigacións en Economía e outras Ciencias Sociais dende o ámbito académico, rematou a primeira fase do proceso de nova adscrición de investigadores e de renovación dos xa vinculados con 75 PDIs da USC que declararon a súa vontade de adscribirse ao Instituto para os próximos catro anos. Estes investigadores pertencen aos campos da Economía, a Xeografía, as Ciencias da Comunicación, a Ciencia Política, a Socioloxía e a Antropoloxía.
“Con este importante capital humano, o IDEGA aspira a incrementar o número de proxectos de investigación, internacionais e nacionais, e o de publicacións científicas de impacto, o volume de contratos de consultaría e informes, así coma o de teses presentadas no marco do seu programa de doutoramento”, afirman dende a dirección do Instituto. Este centro, que, na súa categoría e no ámbito das Ciencias Sociais, pasa a converterse no primeiro en número de investigadores da USC, procurará no 2023 a súa acreditación como centro de excelencia no sistema universitario galego.