Representantes de sete universidades latinoamericanas visitaron as instalacións do Campus de Lugo

Representantes das universidades latinoamericanas integradas no consorcio Lote 18 do programa Erasmus Mundus-External Cooperation Windows (EMECW) visitaron o pasado venres diversas instalacións universitarias do Campus de Lugo nas que estaban especialmente interesados.
Os visitantes, que representaban a sete universidades de Arxentina, Bolivia e Perú, puideron coñecer de primeira man o traballo que se desenvolve a diario no Hospital Veterinario Rof Codina da Facultade de Veterinaria, no edificio CACTUS e no laboratorio da madeira da Escola Politécnica Superior. Todos eles coincidiron en manifestar que esta visita lles permitirá explicar mellor aos seus alumnos as importantes oportunidades de estudo e investigación que as instalacións do campus lugués ofrecen no ámbito das ciencias veterinarias, agroalimentarias e forestais.
O consorcio EMEECW-Lote 18 está integrado por un total de 20 universidades, 9 europeas e 11 latinoamericanas, de recoñecido prestixio internacional e que contan cunha dilata experiencia na xestión de programas de mobilidade.