A residencia universitaria Jesús Bal y Gay lanza unha campaña solidaria de recollida de alimentos ata o 18 de decembro

A residencia universitaria Jesús Bal y Gay do campus de Lugo vén de abrir unha campaña solidaria de recollida de alimentos non perecedoiros ata o vindeiro xoves, día 18 de decembro.

Esta iniciativa, promovida polos bolseiros do centro universitario en colaboración cos demais residentes e aberta á participación de toda a sociedade, pretende recadar víveres, que logo serán doados ao Banco de Alimentos de Lugo. As persoas interesadas en participar nesta campaña de recollida de alimentos poderán depositar as súas respectivas achegas nas dependencias habilitadas para tal efecto na residencia universitaria Jesús Bal y Gay ata o 18 de decembro. O abano de alimentos ou produtos alimenticios susceptibles de ser entregados no marco desta campaña é amplo e admítese calquera tipo de produto non perecedoiro, tales como legumes, pastas, arroz, galletas, sal, azucre, froitos secos, fariña... ou calquera outro alimentos que conteña menos dun 12% de auga libre.