Unha ruta de sendeirismo para estudantes da USC e do Centro de Linguas Modernas mergullarase na Serra do Courel Caurel

Estudantado da USC, así como do Centro de Linguas Modernas, son os destinatarios da ruta das linguas, unha proposta de sendeirismo que percorrerá os días 11 e 12 de abril a Serra do Courel promovida polo Servizo de Deportes. O aloxamento realizarase no Albergue de Folgoso e ofreceranse ata un máximo de 25 prazas. O percorrido repartirase ao longo de dúas xornadas. Na primeira, o sábado 11, transitará entre Vilamor e Vilar dende a ponte de Baldomir, cun grao medio de desnivel e de dificultade e unha lonxitude aproximada de 13 quilómetros. A paisaxe e a riqueza natural son dous dos principais atractivos desta parte do camiño, no que tamén se incluirá unha visita ao castro de Vilar e ao seu pequeno museo etnográfico. Ao día seguinte, o grupo percorrerá a devesa da Rogueira e o cumio de Formigueiros, igualmente con desnivel e dificultade media e unha lonxitude aproximada de doce quilómetros. O itinerario comezará no alto do Couto, a 1.300 metros de altura, e representa a ruta máis sinxela de acadar a máxima altura da Serra. Pola súa banda, a devesa da Rogueira é o bosque máis importante de toda a zona, tanto pola súa dimensión como pola riqueza natural e diversidade. As persoas interesadas poden acadar máis información na web do Servizo de Deportes.