Os sectores produtivos de Galicia implícanse en Campus Vida

Representantes dos sectores da automoción, alimentación, madeira, construción, enerxías renovables e tecnoloxías coñeceron este xoves as principais accións do proxecto Campus Vida da USC. Nunha xuntanza no Edificio Emprendia, o reitor manifestou a necesidade de incrementar a colaboración cos sectores produtivos de Galicia para “contribuír a xerar emprego, riqueza e crecemento económico”. Por iso animou ás empresas galegas a establecer alianzas estratéxicas coa Universidade para mellorar a súa competividade e aproveitar as posibilidades de proxección exterior da USC.
O reitor destacou que Campus Vida pretende conseguir unha Universidade máis comprometida socialmente e con maior capacidade de servir ao tecido produtivo do país. Neste sentido, lembrou que a USC establece cada ano máis de 200 contratos de I+D con empresas e conta cunha facturación media anual en servizos de I+D superior aos 15 millóns de euros.
Subliñou ademais que o proxecto representa un novo modelo de xestión da investigación orientado a obxectivos, xerador de valor económico, que levará á USC a ser un dos mellores biocampus do mundo. “Un novo modelo que servirá de base para o desenvolvemento da investigación futura das diferentes disciplinas da USC”, apuntou.
Ademais do reitor Senén Barro, na sesión interveu Héctor Alonso Fernández, da Área de Responsabilidade Social Corporativa de Inditex, que explicou con casos concretos o modelo de colaboración desta empresa téxtil coa institución universitaria desde hai catro anos en ámbitos como o establecemento de estándares, metodoloxías analíticas de produto ou análise de ADN.
Alonso explicou que os esixentes controis de saúde, seguridade e calidade que establece a marca obríganlle a crear permanentemente protocolos de actuación válidos para os 73 países do mundo nos que opera a multinacional. En palabras de Héctor Alonso “Inditex é hoxe líder en control de seguridade e saúde de produto grazas á colaboración coa USC”.
Cumprida asistenciaDo mundo empresarial acudiron á cita representantes de Inditex, Neoker, Applus Norcontrol, Arias Hermanos, Copasa, Coremain, Engasa, Extrugasa, Finsa, Televés, Uro Vehículos Especiales, Tragsa, CEG, Porto de Celeiro, Export Support Group e Tecam. Ademais, interesáronse por Campus Vida o Instituto Español de Oceanografía, o Centro Tecnolóxico galego de Acuicultura, a Plataforma Tecnolóxica da Madeira, a Fundación para o Fomento da Calidade Industrial e o Desenvolvemento Tecnolóxico, o CIS Madeira, Feuga, Aficega, Agacer e o Cluster Audiovisual de Galicia.
Da USC estaban presentes os vicerreitores Máximo Pló e María José Alonso, os directores dos Institutos de Investigacións Tecnolóxicas e de Acuicultura, así como responsables de oficinas relacionadas coa I+D universitaria.