O Servizo de Deportes propón tres rutas de sendeirismo en outubro

O Barbanza, o Eixo e o Monte Capeloso son os tres lugares que o Servizo de Deportes propón para percorrer este mes nunhas actividades dirixidas non só á comunidade universitaria senón tamén ás persoas alleas á USC.

A primeira proposta é a que descorrerá o sábado 17 polo Barbanza, partindo do alto do Iroite e que chegará ata a Curota, cruzando a serra case na súa totalidade de norte a sur. O mércores 21 será a parroquia do Eixo (con partida na Colexiata de Sar) o lugar elixido para coñecer e que ofrecerá a oportunidade de camiñar por algún treito do Camiño de Santiago.

De maior dificultade é a ruta do sábado 24 polo Monte Capeloso, entre o Cebreiro e o Caurel. Viaxarase ata o concello de Pedrafita e a ruta comezará en Zanfoga. Inclúe a subida ao cumio do Capeloso que goza dunhas panorámicas espectaculares.