O SNL organiza no Campus Terra da USC un certame divulgativo para novos investigadores co gallo do Día da Ciencia en Galego

O Servizo de Normalización Lingüística e o Campus Terra da USC promoven a celebración do certame de divulgación científica ‘DivulgaTerra’, un foro que se desenvolverá o vindeiro 9 de novembro na Escola Politécnica Superior da sede universitaria luguesa e a través do que se pretende dar visibilidade ao traballo desenvolvido polos novos investigadores e investigadoras do Campus Terra da USC.

A promoción da utilización do galego como ferramenta para a comunicación e a difusión dos resultados das investigacións é outro dos cometidos que persigue esta iniciativa, que está aberta á participación de estudantes matriculados en calquera dos posgraos ofertados pola USC no campus lugués, así como a investigadores de doutoramento e bolseiros de investigación que estean a desenvolver a súa actividade en calquera dos centros do Campus Terra da USC. O foro ‘Divulgaterra’ está estruturado nunha sucesión de presentacións científicas cunha duración máxima de dez minutos cada unha. O certame está aberto á participación de todos os novos investigadores/as que adoiten a expoñer en galego o traballo de investigación que están a desenvolver. Existe tamén a posibilidade de tomar parte neste certame a través da realización de pósters, que permanecerán expostos e visibles para o público nun espazo anexo ao que se desenvolvan as presentacións. As persoas interesadas en tomar parte neste certame poden formalizar a súa inscrición de balde ata o domingo 23 na web do Campus Terra da USC. O Servizo de Normalización Lingüística da USC celebrará o vindeiro luns 24 de outubro unha sesión formativa previa á celebración do ‘DivulgaTerra’ e orientada a preparar as intervencións dos investigadores/as inscritos. Nesta xornada, que é de carácter gratuíto para todas as persoas interesadas, trataranse cuestións ligadas á planificación, deseño e redacción de diapositivas para a súa preparación en Powerpoint, realización dun póster científico ou exposición do discurso e posta en escea. A participación no certame ‘DivulgaTerra’ e a asistencia á xornada formativa previa serán recoñecidas con cadanseu diploma, expedido polo Campus Terra e polo Servizo de Normalización Lingüística da USC.