A spin-off da USC Cilenis asóciase con Marc Vidal, un dos analistas económicos e impulsores de proxectos tecnolóxicos máis influentes de España
Nacida no seo dun grupo de investigación da USC, a start-up Cilenis camiña cara á internacionalización coa incorporación como socio da empresa de Idodi Labs, a compañía de Marc Vidal, especialista en emprendemento e nova economía. O acordo permitirá a Cilenis contar co coñecemento e experiencia dun dos analistas económicos máis prestixiosos no ámbito español e internacional. A incorporación de Idodi Labs como socio de Cilenis supón un paso adiante na evolución dunha das spin-off nacidas do seo da USC con máis proxección. Dedicada ao desenvolvemento de produtos e solucións nos campos do procesamento da linguaxe natural e a enxeñería lingüística, é a primeira empresa galega que consegue o apoio de Marc Vidal, explican os promotores da start-up. Este acordo permitirá contar co mentoring, coñecemento e experiencia de Vidal, apoio no desenvolvemento técnico e económico e o impulso no proceso de internacionalización, para o que Cilenis disporá das sedes de Idodi en cidades como Londres, Dublín, Panamá, Boston, Os Ánxeles, Lisboa e Kuala Lumpur, entre outras. O acordo concretouse esta semana nunha reunión de Marc Vidal co equipo de Cilenis no edificio Emprendia da USC. A xornada incluíu un almorzo con profesionais vinculados ás TIC da Universidade de Santiago e do ámbito empresarial, como Alberto Lázaro (Tuapli), José Ramón Pichel (Imaxín Software), Manuel Quintanar (subdirector do Hostal dos Reis Católicos), Mabela Casal (directora da Biblioteca da USC) e os membros de Cilenis Isaac González e Pablo Gamallo, con Juan José Gómez, xerente de Unixest, como anfitrión. Novo impulso para Cilenis A asociación de Cilenis cunha figura de gran proxección pública e referencial no eido do emprendemento e a nova economía supón un impulso a este proxecto nado en maio de 2011 e con clara vocación internacional. É unha empresa spin-off creada por membros do grupo de investigación ProLNat@GE da USC, dirixido polo profesor e investigador Pablo Gamallo. Cilenis ofrece produtos e solucións avanzadas nos campos do procesamento da linguaxe natural e a enxeñería lingüística, aplicando o desenvolvemento tecnolóxico aos recursos lingüísticos. Trátase dun campo con importantes perspectivas de futuro. Marc Vidal a través de Idodi detecta e impulsa novas empresas tecnolóxicas nas que ve potencial competitivo. Cilenis convértese así no primeiro proxecto galego ao que se suma Idodi Labs para apoiar o seu desenvolvemento. Marc Vidal e Idodi Labs Marc Vidal é un analista económico especializado en nova economía, seleccionado en 2010 como unha das dez persoas máis influentes de Internet en España. Logo de traballar como consultor en modernización e internacionalización de grandes empresas, emprendeu unha nova etapa profesional centrada nas start-ups, empresas innovadoras cun gran potencial de crecemento. Fundou cinco empresas nos últimos cinco anos, que dan traballo a máis dun cento de persoas en América e Europa. O seu principal proxecto na actualidade é Idodi, que agrupa Idodi Internacional, Idodi Corporate e Idodi Labs. É a través desta última que Marc Vidal crea e impulsa novos proxectos, construíndo unha rede de empresas tecnolóxicas da que agora forma parte a galega Cilenis.