A temperatura deste martes, a terceira máis alta dos últimos 35 anos

O Observatorio Astronómico Ramón María Aller da USC, centro colaborador da AEMET, confirma que a temperatura máxima deste 6 de setembro en Compostela, 38,7 graos, foi unha das máis altas rexistradas na súa estación meteorolóxica nos últimos 35 anos.

Concretamente, a temperatura de onte foi a terceira máis alta no período medido logo dos 40,3 do 20 de xullo de 1990 e dos 39,7 do 12 de agosto de 2003. A mesma temperatura deste martes tamén se medira o 17 de xullo de 2006.

Nestes 35 anos, setembro rexistrou temperaturas máximas anuais noutras cinco ocasións: o día 6 de 1983 (33 graos), o 11 de 1985 (35º), o 6 de 1988 (37º5), o 8 de 2009 (32º2) e o día 2 de 2014 (33º1).