Últimos días de inscrición no curso de escrita de guións do Espazo de Cine da USC impartido por Pepe Coira

O Espazo de Cine da USC, unha iniciativa posta en marcha pola Vicerreitoría de Estudantes, Cultura e Responsabilidade Social, a través da Área de Cultura do Campus de Lugo para formar, crear e producir no ámbito do audiovisual, mantén aberto o prazo de inscrición no curso ‘O traballo de escribir un guión’, impartido por Pepe Coira.

O curso, dirixido tamén a  persoas alleas á comunidade universitaria, desenvolverase ao longo de oito sesións os venres desde o 26 de febreiro ata o 7 de maio, en quenda de 17.00 a 20.00 horas, na Vicerreitoría de Coordinación do Campus de Lugo. As sesións comezarán en liña ata que a situación sociosanitaria derivada da pandemia permita a súa celebración presencial.

Este módulo formativo impartido polo produtor cinematográfico e guionista lugués Pepe Coira está estruturado en 25 horas. O curso pretende dar resposta a tres cuestións básicas como o son para que serve un guión?, de que está feito? e como é o traballo dun guionista?.

A metodoloxía que rexe esta actividade combina aspectos teóricos e prácticos, se ben en todo caso o achegamento procura ir moi pegado á realidade da escritura do guión, á experiencia de ser guionista. Daquela, traballaranse dous tipos de exemplos: os xerados polo propio alumnado, conforme aos seus intereses e sensibilidades, e os traballos de encargo que formule o relator.

As persoas interesadas en participar na programación formativa do Espazo de Cine da USC poden formalizar xa a súa inscrición nas dependencias da Oficina de Cultura da Vicerreitoría de Coordinación do campus de Lugo ou a través do enderezo electrónico cultura.lugo [at] usc.es (cultura[dot]lugo[at]usc[dot]es). Tamén se pode obter máis información a través do número de teléfono 982 821 513.