Últimos días para participar nas xornadas de portas abertas das actividades deportivas da USC

Ata o próximo día 30, as persoas interesadas dispoñen dos últimos días para participar de balde e probar as distintas escolas deportivas da USC –agás tenis e piscina- en Santiago e Lugo a través das xornadas de portas abertas que organiza o Servizo de Deportes. No caso de grupo nos que o aforo estea completo, poderase observar o desenvolvemento da sesión e facer as consultas que se consideren oportunas.

Na actualidade está aberto o prazo de inscrición para as distintas seccións do servizo deportivo, tanto no relativo a actividades acuáticas, como aeróbicas e de acondicionamento físico, aprendizaxe deportiva, tenis, benestar e lecer e práctica libre. O proceso de matrícula ampliarase o próximo día 29, cando se abrirán as actividades de benestar e lecer, aprendizaxe deportiva e actividades aeróbicas aos colectivos non universitarios (categorías B e C).