Uniemprende organiza un novo seminario de motivación empresarial en Lugo

Setenta alumnos de primeiro curso do Grao de Administración e Dirección de Empresas de Lugo son os destinatarios dun seminario de motivación empresarial que terá lugar este xoves 10 na súa facultade. Trátase do terceiro seminario deste tipo que se desenvolve neste curso académico no campus lugués, dentro do programa de sensibilización que Uniemprende organiza todos os anos co obxectivo de difundir e fomentar a cultura emprendedora entre os universitarios.
Con este seminario, que se desenvolverá dende as 11:00 ata as 12:30 horas, e que conta coa colaboración do Bic-Galicia, Uniemprende pretende achegar aos participantes cómo se xeran as ideas empresariais, ao tempo que lles explica os instrumentos e recursos que están dispoñibles para axudar aos novos emprendedores. Ademais, ao longo do seminario, presentaranse casos reais de mozos que desenvolveron os seus proxectos empresariais en Galicia, amosando a orixe da súa idea, os recursos dos que dispoñían, as dificultades que tiveron que superar e os factores aos que poden atribuír o éxito dos seus negocios.
Uniemprende manterá este ciclo de seminarios ao longo de todo o ano co obxectivo de difundir a cultura emprendedora entre estudantes dos últimos cursos de todas as titulacións que se imparten no campus lugués.