Uniemprende organiza unha xornada técnica de traballo da Rede Mercurio

A Área de Autoemprego do Campus de Lugo, integrada no programa Uniemprende, organiza para este mércores 21 unha xornada técnica de traballo da Rede Mercurio, na que estarán presentes os representantes de todas as entidades que a forman, entre elas a USC. O obxectivo será iniciar a configuración dun novo escenario económico no que o aproveitamento das oportunidades que xurdan del sexan unha estratexia axeitada para fornecer o crecemento do emprego, a creación de novas iniciativas empresarias, así como incrementar a competitividade das empresas.
Esta sesión, que comezará ás 10:00 horas e terá lugar nas instalacións do edificio Cactus do Campus lugués, será a terceira en xerar iniciativas de interese para Lugo, coa finalidade de impulsar e apoiar propostas que favorezan o desenvolvemento da provincia e a creación de emprego de calidade.
A Rede Mercurio está formada por numerosas entidades. Ademais da Universidade de Santiago, intégrana tamén o Concello de Lugo, a Deputación Provincial, a Confederación de Empresarios, a Fundación Cel, a Cámara de Comercio, a Federación Galega de Comercio, o Centro Tecnolóxico Agroalimentario, a Asociación de Jóvenes Empresarios de Lugo, a Asociación de Mulleres Empresarias, a Asociación de Empresarios de O Ceao e a Asociación Galega de Empresas TIC.