Uninova xestionou o intercambio de medio centenar de emprendedores a través do programa Erasmus for Young Entrepreneurs
Nos últimos catro anos, a incubadora de empresas da USC Uninova xestinou a realización de estadías a 52 emprendedores/as que puideron coñecer e intercambiar experiencias de traballo con empresarios experimentados doutros países da Unión Europea a través do programa Erasmus for Young Entrepreneurs. Este programa é unha iniciativa da UE para o intercambio de emprendedores e empresas procedentes de diversos países da UE.
Uninova participou nas catro últimas convocatorias liderando outros tantos proxectos a través de consorcios internacionais nos que participaron diversas universidades, centros de investigación, consultoras ou incubadoras de Alemaña, Portugal ou Países Baixos. En calidade de Intermediary Organization (IO), en toda Europa participan neste programa un centenar de entidades, de entre as que Uninova colectou nestas dúas últimas convocatorias o recoñecemento de situarse como a oitava IO que mellor desenvolve o seu traballo en 2014 e sétima en 2013. Ademais, Uninova é a única IO autorizada na Comunidade Autónoma de Galicia. O programa Erasmus for Young Entrepreneurs permite que emprendedores/as cun plan de empresa elaborado ou emprendedores que xa crearon a súa empresa (sempre que se trate dunha PEME e teña menos de tres anos de existencia) poidan realizar unha estadía formativa de entre 1 e 6 meses cun empresario experimentado doutro país da UE así como dun grupo de países participantes (nesta última edición: Liechtenstein, Noruega, Macedonia, Islandia, Montenegro, Turquía, Albania, Serbia e Israel). Ao longos destes catro anos de traballo, Uninova xestionou as solicitudes de emprendedores tanto da comunidade universitaria como de fóra dela. Concretamente, na convocatoria vixente, preto do 60% estaban vinculados a proxectos empresariais e spin-off da USC. Nas súas estadías para coñecer outras experiencias, emprendedores e emprendedoras dirixíronse a un total de doce países, aínda que o maior interese concentrouse en empresas de Reino Unido (11 estadías), Alemaña (9), Italia (9), Portugal (9), Francia (5), Países Baixos (3), Austria (1), Bélxica (1), Croacia (1), Malta (1), Rumanía (1) e Suecia (1). Pero ademais, Galicia tamén foi destino para un total de dez emprendedores procedentes de Portugal (4), Italia (3), Bélxica (1), Hungría (1) e Suecia (1) .