A Universidade analizará a importancia da educación para respectar os dereitos humanos nun curso en Santiago

A Universidade de Santiago celebrará do 22 ao 24 de setembro na Facultade de Ciencias da Educación de Santiago o curso de verán ‘Educación, dereitos humanos e cidadanía’, dirixido por Manuel Dios Diz e Ramón Sánchez Rodríguez. As clases teñen como obxectivo dar a coñecer as dimensións epistemolóxica, educativa e humanizadora dos dereitos humanos.
Así, ao longo de 30 horas lectivas, tentarase facer comprender aos asistentes a complexidade e a non neutralidade dos procesos educativos en xeral e dos procesos de ensino aprendizaxe en particular.
Tentarase ademais fomentar a construción participada de regras de convivencia democrática e promover comportamentos respectuosos co medio natural, social e cultural en beneficio das xeracións presentes e futuras.
Incidirase na necesidade de rexeitar toda forma de violencia e prever os conflitos, eliminando as súas causas mediante o diálogo e a negociación, para lograr respectar a igualdade de dereitos e oportunidades para homes e mulleres.
A taxa xeral de matrícula para este curso é de 120 euros. Existe un prezo reducido, de 70 euros, para estudantes universitarios, persoas desempregadas e PDI e PAS da USC. O prazo para a inscrición, tanto a través internet como por vía presencial (ata o 11 de setembro), xa está aberto.