A Universidade estudará nun curso de verán a zona do Courel como espazo educativo

A Universidade de Santiago celebrará do 7 ao 11 de setembro no edificio multiusos de Seoane do Courel o curso 'O Courel como espazo educativo. Recursos didácticos'. Trátase de 30 horas lectivas nas que se divulgarán os valores patrimoniais do Courel.
Ao longo deste curso, dirixido por Manuel Antonio Fernández Domínguez, aportarase aos asistentes elementos básicos na formación inicial e continua dos profesores interesados na temática medioambiental.
A finalidade será sentar as bases metodolóxicas e conceptuais para o aproveitamento dos espazos naturais como lugares de aprendizaxe, abrindo vías para potenciar as dinámicas de divulgación e interpretación na bisbarra do Courel.
A taxa xeral de matrícula para este curso é de 120 euros. Existe un prezo reducido, de 70 euros, para estudantes universitarios, persoas desempregadas e PDI e PAS da USC. O prazo para a inscrición, tanto a través internet como por vía presencial (ata o 28 de agosto), xa está aberto.