A Universidade estudará o fenómeno da espectacularización da cultura nun curso de verán en Santiago

A Universidade de Santiago analizará desde distintos puntos de vista o fenómeno da espectacularización da cultura co curso de verán ‘A “espectacularización” da cultura’, que se celebrará do 28 ao 31 de xullo na Facultade de Xeografía e Historia de Santiago.
As sesións deste curso, de 30 horas lectivas, partirán da idea de que no mundo contemporáneo se están a diferenciar con claridade dúas versións da cultura. Así, estudarase unha primeira corrente, tendente a convocar grandes multitudes en torno a accións de grande proxección mediática (grandes exposicións, grandes museos, espectáculos na televisión).
Unha segunda versión, máis especializada e con afán crítico, que cuestiona os parámetros da cultura promovida polas grandes institucións, e que se desenvolve preferentemente a través de redes sociais, colectivos, ou círculos académicos, e se basea na reflexión e na comunicación real entre individuos, tamén se analizará ao longo do curso.
A taxa xeral de matrícula para este curso é de 120 euros. Existe un prezo reducido, de 70 euros, para estudantes universitarios, persoas desempregadas e PDI e PAS da USC. O prazo para a inscrición, tanto a través internet como por vía presencial (ata o 17 de xullo), xa está aberto.