A Universidade de Santiago ofrece á comunidade universitaria un tradutor en liña galego-español-inglés

A Universidade de Santiago de Compostela ofrece á comunidade universitaria o acceso a un tradutor en liña galego-español-inglés personalizado para o traballo no contorno universitario. Baseado en Opentrad, unha plataforma de servizos de tradución en código aberto que utiliza como base o motor de tradución automática Apertium, a ferramenta foi personalizada para a Universidade de Santiago de forma que sexa capaz de traducir de modo correcto terminoloxía específica deste ámbito, como poden ser os nomes de servizos e unidades, centros, facultades ou departamentos universitarios. O tradutor –que, como todos, precisa que o texto final sexa revisado- ofrece outros pares de linguas, galego-inglés, inglés-galego, español-inglés, inglés-español, e algunhas outras que se encontran en distintos niveis de desenvolvemento. Entre as súas funcionalidades permite traducir fragmentos de texto de xeito instantáneo; documentos en formatos txt, html, doc, odt, ods, odp, docx e xlsx; presentacións (Powerpoint 2007 e seguintes versións) mantendo os formatos orixinais; e páxinas web coa simple introdución do URL correspondente. Ademais, dende a mesma páxina pódense descargar plug-ins para os navegadores Firefox e Chrome e para o procesador de textos MS-Word, de modo que se poida axilizar o proceso de tradución. Para acceder a el é preciso identificarse como membro da comunidade universitaria. Dende a Universidade de Santiago de Compostela accédese a través de http://tradutor.usc.es (galego) e http://traductor.usc.es (castelán). Esta nova ferramenta foi adquirida polas universidades galegas a través do Consorcio para o Desenvolvemento de Sistemas para a Xestión Universitaria (CIXUG) e adaptada á USC coa colaboración do seu Servizo de Normalización Lingüística e da Área TIC.