Universidades de Colombia coñecen as particularidades do programa Uniemprende
Unha delegación de seis universidades públicas e privadas de Colombia acaban de rematar unha visita á USC onde se desprazaron para coñecer as particularidades do programa Uniemprende. O grupo visitou o edificio Emprendia, sede do mencionado programa, onde foron recibidos polo director de Uniemprende, Carlos Hernández Sande, e polo xerente de Uninova, Gustavo Marcos. Integraron esta delegación representantes das universidades de La Salle, Nacional de Colombia, Pontificia Bolivariana, a Escola Colombiana de Ingeniería e as universidades CES e EAFIT.
Na visita, o grupo puido coñecer en profundidade as distintas entidades que conforman o Programa de creación de Empresas da USC (Uniemprende), como son o Centro de Innovación e Transferencia de Tecnoloxía; a incubadora de empresas Uninova; a sociedade de capital risco Unirisco; a sociedade xestora de entidades de capital risco Uninvest, Uniban, business angels network; ENU, escola de Negocios Uniemprende; o programa dirixido á muller universitaria emprendedora Woman Emprende; Emprendia, información e servizos ao emprendemento universitario; ou Empresa Concepto, programa de apoio a investigadores para a creación de spin off¨s.
A delegación colombiana tamén entrou en contacto con Uniemprende Internacional, plataforma internacional de servizos ao emprendemento; Inberso, mercado alternativo de Spin Off; coa Cátedra Unesco, dedicada á innovación e xestión da cultura emprendedora no marco universitario; Social Emprende, iniciativa que fomenta a creación de empresas no ámbito da investigación da área de humanidades; ou Spin Grow, rede de axentes de promoción empresarial especializada na busca de financiamento.
Ao longo das diferentes intervencións realizadas por integrantes do Programa explicouse aos asistentes a metodoloxía empregada neste eido, dende a detección de novas ideas e proxectos empresariais, concursos de ideas e proxectos e accións de difusión, ata o apoio e seguimento as empresas creadas.