A USC abre a inscrición na nova edición do campionato D3Mobile Metrology World League

A Universidade de Santiago de Compostela convida a todos os estudantes e os seus profesores/centros educativos a participar na Metrology World League, un campionato científico internacional totalmente en liña e gratuíto para promover as vocacións científicas entre os mozos e iniciar aos estudantes no modelado 3D e os novos métodos emerxentes de medición de precisión utilizando o teléfono móbil.

O campionato D3Mobile Metrology World League 2016 está aberto á participación de equipos formados por entre 2 e 4 estudantes, de entre 15 e 17 anos de idade, liderados por un profesor, de calquera centro educativo de todo o mundo. Os equipos interesados en participar neste campionato, a través do que é posible aprender a facer modelos 3D de precisión co móbil ademais de gañar fantásticos premios, deben formalizar a súa inscrición na na páxina web do campionato (http://d3mobile.es). A data límite de inscrición é o 14 de marzo de 2016. Os promotores de D3MOBILE, un campionato de divulgación científica escolar promovido polo grupo de investigación USCAN3D da USC, en colaboración coa Fundación Española para a Ciencia e a Tecnoloxía e outras entidades públicas e privadas, españolas e estranxeiras, anima a participar neste certame a todos os profesores de CTIM (Ciencia, Tecnoloxía, Enxeñaría, Matemáticas) Física, Informática, Educación Plástica e Visual, (TIC) Tecnoloxía da Información, Bioloxía, Xeoloxía, Ciencias da Terra e do Medio Ambiente.