A USC abre o prazo para solicitar as bolsas de Sostibilidade, Participación e Integración Universitaria

Por cuarto ano consecutivo, a USC convoca as Bolsas de Sostibilidade, Participación e Integración Universitaria (SPIU) dirixidas aos estudantes para o desenvolvemento, nas facultades e escolas, de actividades relacionadas co medio ambiente e o desenvolvemento sostible. Ademais, os bolseiros colaborarán activamente na difusión entre todos os membros da comunidade universitaria destas actividades e de accións solidarias emprendidas dende a institución.
Esta iniciativa, cuxo prazo de recepción de solicitudes remata o venres 19 de outubro, está programada conxuntamente polo Servizo de Participación e Integración Universitaria dependente da Vicerreitoría de Comunidade Universitaria e Compromiso Social e a Coordinación do Plan de Desenvolvemento Sostible da Vicerreitoría de Calidade e planificación.
Os estudantes que desexen solicitar estas bolsas deberán presentar as instancias e a documentación necesaria nalgún dos rexistros xerais da USC, dentro dos prazos sinalados na convocatoria. No web da Universidade de Santiago pódese atopar máis información sobre esta convocatoria e sobre os proxectos desenvolvidos nas anteriores.
Campaña pasadaDurante o curso pasado e no marco das Bolsas SPIU as principais actividades encamiñáronse á colaboración coa campaña de prevención do tabaquismo da USC mediante a realización de avaliacións gratuítas de CO no aire expirado, a difusión do Plan de Desenvolvemento Sostible con mesas informativas nos centros docentes ou o diagnóstico da situación dos centros con relación a aspectos como o aforro enerxético e a xestión de residuos... Ademais, tamén realizaron actividades formativas como a visita ao parque eólico experimental de Sotavento.