A USC e Aresa entregan o XIII Premio de Desenvolvemento Rural este venres na Facultade de Veterinaria de Lugo
O reitor da Universidade de Santiago, Juan Casares, presidirá este venres 8 de febreiro a cerimonia de entrega do XIII Premio Aresa de Desenvolvemento Rural, nun acto que se desenvolverá a partir das 20.00 horas no auditorio Enrique González García da Facultade de Veterinaria do campus de Lugo, onde se darán cita numerosos responsables políticos locais, provinciais e autonómicos, así como distintas autoridades académicas, representantes do tecido empresarial ademais dunha nutrida representación de traballadores do campo.
O director xeral da Sociedade Cooperativa Galega Feiraco e actual presidente da Interprofesional Láctea Española , José Luis Antuña Álvarez, ofrecerá unha conferencia no marco deste acto baixo o título ‘O sector lácteo no mundo global’, intervención durante a que non só abordará a actual situación pola que atravesa o sector do leite, senón que tamén fará importantes apuntamentos sobre as futuras transformacións que deben acometer produtores e industrias no futuro inmediato. O xurado encargado de fallar a decima terceira edición deste galardón, instaurado polo grupo Aresa no ano 2000 e a través do que pretende contribuír a xerar máis riqueza no campo, acordou distinguir nesta edición á empresa Champivil S.L., radicada en Vilalba e que centra a súa actividade na comercialización e exportación dunha ampla gama de vexetais, desde cogomelos ata verzas e grelos, ademais doutros produtos en conserva e previamente xa elaborados. A administradora de Champivil S.L., Luz Divina Castelo, será a encargada de recoller este galardón, co que o grupo Aresa e a Universidade de Santiago destacan a traxectoria desta iniciativa empresarial de carácter familiar, fundada por Andrés Castelo no ano 1977 e actualmente rexentada pola segunda xeración nas súas e ampliadas instalacións da vilalbesa parroquia de Mourence. A empresa Champivil, gañadora do XIII Premio Aresa de Desenvolvemento Rural, un galardón que nesta última convocatoria quixo facer un recoñecemento especial ás iniciativas empresariais que permiten a creación de emprego no medio rural, pasa a engrosar así a xa ampla nómina de merecedores do prestixioso Premio Aresa de Desenvolvemento Rural, que contempla unha dotación en metálico de 10.000 euros para o gañador. A familia Castelo engade deste xeito o nome da empresa Champivil á nómina do Premio Aresa, un galardón que na súa edición do ano pasado recaeu na S.A.T. Monte de Trabada. A Asociación Nacional de Criadores de Gando Vacún Selecto de Raza Rubia Galega (Acruga), o grupo empresarial Ingapan, a Facultade de Veterinaria do campus de Lugo da Universidade de Santiago, a queixería Casa Macán, a Denominación de Orixe Ribeira Sacra, o programa da TVG ‘O Agro-labranza’, a IXP Ternera Gallega, o director xeral de Agricultura da Comisión Europea, José Manuel Silva; a Aula de Productos Lácteos da USC, o catedrático de Bioloxía Vexetal da USC, Javier Guitián Rivera, e a empresa Novafrigsa completan o listado de galardoados co Premio Aresa de Desenvolvemento Rural. Ao remate do acto de entrega do XIII Premio Aresa, os asistentes poderán degustar un ágape na entrada do auditorio da Facultade de Veterinaria, onde se servirá un viño español ademais de varios dos produtos vexetais comercializados por Champivil SL e polos seus provedores.