A USC entrega os primeiros Suplementos Europeos ao Título de graos e mestrados de Galicia
Egresados e egresadas de Matemáticas recibiron este luns en San Xerome os seus Suplementos Europeos ao Título (SET), un documento informativo e complementario do título universitario que describe a súa natureza e rango e desglosa polo miúdo as capacidades e coñecementos adquiridos polo estudante así como o seu expediente.
A USC é así a primeira universidade galega que expide este documento, xa adaptado á nova configuración de títulos universitarios (graos e mestrados) e que supón un gran paso para a mobilidade, toda vez que ata hai pouco na UE o recoñecemento entre países requiría de complexos trámites tales como lexitimación de sinaturas ou a chamada ‘Apostilla de La Haya’. Como dixo o reitor no acto, “trátase dun elemento administrativo de vital importancia por ser o documento europeo acreditativo dos estudos cursados con validez en todo o EEES”. A compostelá xa fora tamén no seu día a primeira universidade en entregar os SET a licenciados e licenciadas.
En concreto, este luns participaron graduados e graduadas en Matemáticas e titulados e tituladas dos mestrados en Matemáticas e Matemática Industrial, que recibiron os seus SET de mans da súa decana, Victoria Otero, e do reitor Juan Viaño, que lembrou que ese título foi dos primeiros en adaptarse ao Espazo Europeo de Educación Superior (EEES) ademais de mostrar a súa total dispoñibilidade a participar no plan piloto para a implantación do SET, “achegando toda a documentación precisa e colaborando activamente no deseño da estrutura de datos deste documento”.
En próximas datas outorgarase tamén o SET electrónico e estase a traballar para incorporar sistemas que permitan obtelo de forma automatizada no momento de solicitar o depósito do título na Sede Electrónica da USC ou mediante códigos QR.