A USC honra a muller emprendedora no Día Internacional das Mulleres

A muller emprendedora será a protagonista do acto conmemorativo organizado pola USC con motivo do Día Internacional das Mulleres e que presidirá o reitor da USC Juan Viaño este venres 6 a partir das 17.00 horas no Salón Nobre do Colexio de Fonseca. Compartirá mesa presidencial co secretaria xeral de Igualdade da Xunta de Galicia, Susana López Abella; a concelleira de Servizos Sociais do Concello de Santiago, Mª José Corral López; e a vicerreitora de Servizos Universitarios do Campus de Lugo, Mª do Carme Silva Domínguez. Logo da quenda de intervencións das respresentantes institucionais, o reitor entregará unha placa con Mención Honorífica ao Programa Woman Emprende da USC en recoñecemento á súa traxectoria en prol da igualdade dende o punto de vista da creación de empresas. Woman Emprende é unha rede para desenvolver, dentro do programa Uniemprende, unha plataforma de traballo para potenciar a creación de empresas no ámbito universitario e conseguir resultados de participación das mulleres en consonancia á súa cota de participación na Universidade. A xornada concluirá cunha interpretación musical a cargo do Espazo de Cámara da USC.