A USC co-organiza en Zamora a oitava edición do Encontro Internacional de Emprendedores Novos

A USC colabora na organización da oitava edición do Encontro Internacional de Emprendedores Novos que estes días se celebra en Zamora na Escola Politécnica Superior para promover a cultura do emprendemento. O encontro trata de fornecer a presentación de proxectos de emprendemento nas universidades e institutos politécnicos españois e do norte de Portugal.

A base do programa é a presentación de proxectos de iniciativa empresarial e social propostas por alumnado de todas as institucións participantes. Un xurado composto por profesorado universitario elixirá as propostas que considere con maior interese en base a criterios como o grao de innovación, impacto económico e social ou viabilidade de implantación, entre outros elementos de valoración. Por parte da USC concorrerán un total de catro proxectos (EnergyFarm, Thermood, Iceberg 360 e Skeirrum) e contará coa participación como xurado de Loreto Fernández Fernández, Emilia Vázquez Rozas e Eva López Barrio.