A USC reflexiona nun dos seus cursos de verán sobre a realidade e o futuro das industrias galegas de transformación da madeira

A realidade e as perspectivas de futuro das industrias de primeira transformación da madeira é a temática dun dos cursos de verán da USC, que se celebrará na Escola Politécnica Superior do Campus de Lugo os días 18 e 19 de xullo. O curso está dirixido polo profesor da EPS Pablo Vila Lameiro, e ten como secretarios os tamén docentes da Escola Ignacio Javier Díaz-Maroto e Jesús Sánchez Rocha. No acto de inauguración do día 18 está prevista a presenza do secretario xeral de Montes e Medio Rural da Xunta de Galicia, Tomás Fernández-Couto Juanas; do alcalde de Lugo, José Clemente López Orozco; e do director da Escola Politécnica Superior, Javier Bueno Lema. A conferencia inaugural correrá a cargo de Francisco Dans del Valle, do profesor da USC e membro da Asociación Forestal de Galicia, e leva por título ‘Debilidades e ameazas do sector forestal. A estrutura da propiedade en Galicia’. O resto do curso estrutúrase a partir dunha serie de mesas redondas nas que, ao longo dos dous días do encontro, se irán abordando temas como o monte e a industria de primeira transformación en Galicia, os condicionantes para o aproveitamento madeireiro dos montes galegos, o impacto da industria de primeira transformación en Galicia e en Europa, a industria do aserrado e a industria do taboleiro e da celulosa. Profesores da USC e doutras universidades, técnicos da Xunta de Galicia, representantes do mundo empresarial e responsables de entidades asociativas do sector forestal de Galicia e Asturias participarán nos coloquios. No acto de clausura do día 19 intervirán o presidente da Deputación Provincial de Lugo, José Ramón Gómez Besteiro, e o director da Escola Politécnica Superior de Lugo, Javier Bueno Lema. A actividade consta dun total de 16 horas lectivas, e a matrícula pode realizarse a través da páxina web da Área de Cultura da USC.