A USC e Sanofi Genzyme crearán a Cátedra de Enfermidades Metabólicas Hereditarias

O reitor Juan Viaño e o director xeral de Sanofi Genzyme, Francisco J. Vivar, asinarán este mércores 20 un convenio de colaboración para a creación da Cátedra de Enfermidades Metabólicas Hereditarias, que estará adscrita ao Departamento de Pediatría e promoverá a investigación e a docencia no campo dos erros conxénitos do metabolismo. O acto protocolario de sinatura celebrarase ás 12.00 horas no Salón Reitoral do Colexio de San Xerome.

Esta cátedra permitirá potenciar e promover actividades innovadoras no ámbito da docencia, a diagnose precoz e a bioxenética aplicada ao campo das enfermidades metabólicas conxénitas. A súa dirección recaerá no profesor José Mª Fraga Bermúdez e na xefe de Sección de Neonatoloxía e Enfermidades Metabólicas e directora da Unidade e Diagnose e Tratamento de Enfermidade Metabólicas no Complexo Hospitalario Universitario de Santiago (UDyTEMCs), María Luz Couce Pico.

Como sinala o doutor Fraga Bermúdez, está cátedra supón unha “iniciativa singular e unha oportunidade emblemática para profundar no estudo das enfermidades raras, mellorar a capacidade diagnóstica neste eido e achegar e incrementar solucións e esperanzas nun campo da medicina que ata hai pouco estaba pouco desenvolvido”.