A USC entre as Universidades españolas máis destacadas do mundo en produción científica

A Universidade de Santiago figura no posto 330 do ránking da Universidade Nacional de Taiwan sobre publicacións científicas de universidades de todo o mundo. A de Santiago é a sexta española mellor posicionada nesta listaxe que clasifica as universidades só tendo en conta indicadores bibliométricos concentrados en produtividade, impacto e excelencia investigadora. É, por tanto, un ránking estritamente de rendemento investigador que toma como referencia as 500 mellores Universidades do mundo e as 300 máis relevantes nos campos de ciencias sociais, enxeñaría, ciencias da vida, ciencias naturais, medicina clínica e agricultura. Ademais de ponderar os resultados en función do tamaño das universidades, o ránking considera a produción científica tomando en conta tanto períodos longos de tempo (11 anos) como curtos (1 ano para publicacións e 2 para citacións). Utiliza os índice de citacións SCI e SSCI, mais ningún relativo a Humanidades. No eido das matemáticas, no que destacan un total de 12 universidades españolas, a USC figura á cabeza destas e no lugar 59 de entre as de todo o mundo. Outro ámbito destacado é a farmacoloxía e toxicoloxía, no que a USC se sitúa en cuarto lugar das do Estado e no 174 do mundo. Outras universidades españolas

Por diante da USC, España está ademais representada pola Universidade de Barcelona (posto 115), Autónoma de Barcelona (191), Autónoma de Madrid (231), Universidade de Valencia (253) e Complutense (259). Tamén figuran nesta listaxe as universidade de Granada (335), Zaragoza (382), Pompeu Frabra (408), País Vasco (420), Oviedo (461), Politécnica de Valencia (471) e Sevilla (483).