O XII Congreso da SEAE cita 300 participantes en Lugo nun foro internacional sobre agricultura ecolóxica

O XII Congreso da Sociedade Española de Agroecoloxía (SEAE) ‘ Leguminosas: Clave na xestión dos agrosistemas e a alimentación ecolóxica’ cita desde hoxe ata o venres na capital luguesa arredor de 300 participantes, entre produtores, investigadores, estudantes e empresarios, no marco dun foro de carácter internacional no que se presentarán algúns dos últimos avances acadados no eido da agricultura ecolóxica e a prol do desenvolvemento rural, ao tempo que se debaterán un total de 130 comunicacións e pósters.

É un motivo de ledicia poder celebrar esta cita de carácter bienal en Galicia, e concretamente en Lugo, salientou a presidenta da SEAE, María Dolores Raigón, na apertura do congreso, no marco dun acto no que tamén participaron o vicerreitor de Coordinación do campus de Lugo, Javier Bueno; a alcaldesa de Lugo, Lara Méndez; o presidente da Deputación Provincial de Lugo, Darío Campos, a directora xeral de Gandería, Agricultura e Industrias Alimentarias da Xunta de Galicia, Belén do Campo, e o presidente do Consello Regulador de Agricultura Ecolóxica de Galicia (Craega), José Antonio Fernández. Logo de agradecer a colaboración recibida de todas as entidades e empresas implicadas na organización deste foro e tras facer fincapé na elevada participación rexistrada, Raigón salientou as potencialidades que presenta Galicia no ámbito das leguminosas, en particular, e da agricultura ecolóxica, nun contexto máis amplo, dada a importancia desta rexión nos ámbitos da agricultura, a ecoloxía e a gandería. O vicerreitor de Coordinación do campus de Lugo, Javier Bueno Lema, lembrou na súa intervención que os obxectivos deste congreso e da SEAE están aliñados cos do Campus Terra, un proxecto da USC para converter a sede universitaria luguesa nun referente nacional e internacional no que atinxe a xestión sustentable da terra e das súas producións. Bueno, salientou o elevado número de profesores e investigadores do Campus Terra da USC que contribúen coas súas achegas ao éxito deste congreso, ao tempo que fixo unha defensa a prol da educación e da formación universitaria como elementos de vital para avanzar na sustentabilidade, na innovación e no desenvolvemento do medio rural, na produción de alimentos e, en consecuencia, na progresiva mellora do grao de benestar de toda a poboación. Programa do congreso O programa do XII Congreso da Sociedade Española de Agricultura Ecolóxica comezou cunha visión xeral sobre a realidade da agricultura ecolóxica no contexto europeo a cargo de S. Bellón, investigador francés do INRA. A relación entre leguminosas, agroecoloxía e produción de alimentos centrou a temática das sesións matinais deste foro, que continuou en sesión de tarde con relatorios sobre silvopastoralismo e agroecoloxía, gandería ecolóxica, alternativas de futuro e políticas agroecolóxicas e agroforestais. A presentación de comunicacións e pósters completou o programa da xornada de apertura dun foro internacional que abrirá a súa actividade do xoves con dúas conferencias sobre soberanía agroalimentaria e agroecoloxía e comercialización e canles curtas agroecolóxicas. O desenvolvemento rural agroecolóxico a comercialización, consumo e a distribución de produtos e o novo regulamento europeo sobre agricultura ecolóxica serán outros asuntos a abordar mañá. A programación de actividades deste xoves tamén inclúe en quenda de tarde, a partir das 18.30 horas, unha sesión aberta sobre agroecoloxía, produción ecolóxica e emprendemento en Galicia. Esta actividade, que contará coa participación de operadores e empresas do sector, estará moderada polo director do Craega e polo director da Fundación Juana de Vega. Feira NaturaLugo A apertura, a partir das 15.30 horas, da feria NaturaLugo, unha mostra multisectorial que contará con máis de medio centenar de expositores representativos da realidade da agroecoloxía en Galicia e na que tamén estará presente o Campus Terra da USC, posibilitará aos congresistas participantes coñecer de preto o que se fai en Galicia no ámbito da agricultura ecolóxica, ao tempo que servirá para achegar á agraoecoloxía a todas as persoas que se acheguen ata os diversos postos instalados no Pazo de Feiras e Congresos. A mostra NaturaLugo permanecerá aberta ata o sábado 24, data na que aínda continuarán a celebrarse algunha das actividades e dos preto de 30 obradoiros organizados en parello ás sesións incluídas no programa do XII Congreso da Sociedade Española de Agroecoloxía.