O XII Encontro de Morfólogos desenvólvese este venres en Filoloxía

Investigadores do campo da morfoloxía reúnense este venres 6 en Filoloxía no seu décimo segundo encontro para analizar nesta ocasión as zonas de solapamento entre os diversos procesos morfolóxicos.

Os Encontros de Morfólogos veñen celebrándose anualmente desde 2005 en diversas universidades españolas e neles danse cita tanto investigadores españois como estranxeiros de moi diversas adscricións teóricas e metodolóxicas. Estes eventos científicos naceron baixo o amparo da Rede temática de morfoloxía e difúndense tanto a través desta rede como do blog MORFORETEM.

A décimo segunda edición comezará este venres ás 9.30 horas coa intervención da decana da Facultade, Mª José López Couso, e os profesores Guillermo Rojo e Jesús Pena. A continuación pronunciará a conferencia inaugural Graça Rio-Torto, da Universidade portuguesa de Coimbra, baixo o título ‘Composição de palavras: temas-problemas’.

O resto dos relatorios correrán a cargo de David Serrano Dolader, da Universidade de Zaragoza; Josefa Martín García, da Autónoma de Madrid; José Carlos Martín Camacho, da de Estremadura; e Franz Rainer, da Wirtschafts Universidade de Viena (Austria).

Ademais dos cinco relatorios haberá espazos dedicados á presentación de pósteres aberta a todas as persoas participantes, especialmente a doutorandos e novos investigadores.