O XIII Festival de Teatro Grecolatino cita a 4.000 estudantes preuniversitarios no auditorio Gustavo Freire de Lugo

O XIII Festival de Teatro Grecolatino, organizado pola sección galega da Sociedade Española de Estudos Clásicos (SEEC Galicia) cuxa directiva pertence ao Departamento de Latín e Grego da Universidade de Santiago de Compostela, colleitou un novo éxito no auditorio Gustavo Freire de Lugo, unhas instalacións municipais polas que pasaron ata o mércores preto de 4.000 estudantes procedentes de numerosos centros de ensino secundario e Bacharelato de toda Galicia.

Os asistentes que acudiron a esta cita coa arte dramática tiveron a ocasión de contemplar en directo a posta en escena dalgunha das xoias da traxedia e comedia gregas e romanas. Así, o luns, na xornada inaugural do festival os grupos coruñeses Phoenix e El Ruiseñor representaron ‘Agamenón’, de Esquilo, e ‘As Tesmoforias’, de Aristófanes. O martes 5, o grupo Noche bohemia puxo en escena ‘ Ifixenia en Áulide’, de Eurípides, e ‘Cásina’, de Plauto. O XIII Festival de Teatro Grecolatino chegou este mércores ao seu fin coa representación das obras ‘Aulularia’, de Plauto, e ‘Electra’, de Sófocles.

A sección galega da Sociedade Española de Estudos Clásicos aproveitou a celebración deste festival para, do mesmo xeito que en edicións anteriores, facer entrega dos premios en metálico do seu concurso: Odisea. Este nova edición do certame, que se estrutura nunha competición en liña sobre cultura clásica, rexistrou a participación de 174 equipos de distintos centros educativos de Galicia. O primeiro premio do concurso foi para o equipo Kalendas Galaicas, do IES Pontepedriña, de Santiago de Compostela.