O XIV Concurso de Proxectos Empresariais Innovadores da USC entrega os seus premios

A décimo cuarta edición do Concurso de Proxectos Empresariais Innovadores da USC entregará este venres 4 os seus premios nun acto que presidirá o reitor Juan Viaño e ao que tamén está prevista a asistencia do secretario xeral de Universidades, José Alberto Díez de Castro. A entrega dos galardóns nas categorías de Base Tecnolóxica, Empresa Xove e Muller Emprendedora, entre os proxectos presentados susceptibles de converterse en empresas, comezará ás 12.00 horas no Salón Reitoral do Colexio de San Xerome. Asistirán ademais as vicerreitoras de Estudantes, Cultura e Responsabilidade Social e de Investigación e Innovación, Dolores Álvarez Pérez e Isabel Rodríguez-Moldes Rey; a subdirectora xeral de Xestión Técnico-Administrativa e Orzamentaria da Secretaría Xeral da Igualdade, Mª Fe Alvedro Riveiro; e o director do programa Uniemprende da USC, Carlos Hernández Sande. A USC impulsa este concurso co obxectivo de apoiar a creación de empresas innovadoras promovidas por estudantes, titulados/as e/ou investigadores/as de calquera das tres universidades galegas, así como dos centros asociados da Uned emprazados en Galicia, ademais de fomentar a innovación empresarial e a xeración de emprego. As persoas que promoven o proxecto de empresa innovadora distinguido na modalidade de empresa de base tecnolóxica, percibirán un premio de 2.000 euros, ademais de ter a posibilidade de acadar ata 24.000 euros de financiamento a través dun préstamo participativo. Os premios Empresa Xove e Muller Emprendedora tamén contarán nesta edición con cadansúa dotación económica de 2.000 euros. Na selección de premiados, o xurado valorou a viabilidade dos proxectos, o grao de innovación do produto, proceso ou servizo, o volume de emprego proxectado, o carácter multidisciplinar do equipo promotor e a presenza de políticas de igualdade.