A xornada ‘Móvete por Europa’, sobre emprego, prácticas e programas de mobilidade, cita 30 asistentes na Intercentros
As xornadas informativas e de divulgación sobre bolsas de emprego, prácticas e programas de mobilidade para estudantes e titulados universitarios ‘Móvete por Europa, un foro organizado pola Vicerreitoría de Servizos Universitarios do campus de Lugo a través da Área de Orientación e Inserción Laboral co gallo da celebración do Día de Europa, citaron este luns 30 participantes na Aula Universia da Biblioteca Intercentros do Campus Terra da USC.
A Vicerreitoría de Servizos Universitarios do campus de Lugo, Carme Silva Domínguez, foi a encargada de dar a benvida ás persoas inscritas nesta xornada, promovida co obxectivo de dar a coñecer as oportunidades de emprego, prácticas, formación, bolsas e programas de mobilidade aos universitarios, ademais de dotalos das claves e recursos necesarios para moverse por Europa. Raquel Álvarez Alcaraz, da Fundación Galicia Europa, abriu a quenda de relatorios deste foro cunha intervención na que deu conta dalgunhas das oportunidades laborais e formativas existentes en Europa, ao tempo que presentou a guía de prácticas e saídas laboral na UE e noutras organizacións internacionais. De seguido, Fernando Rodríguez, técnico dinamizador da Rede Galega de Dinamización Xuvenil , informou ao público asistente do programa de mobilidade xuvenil en prácticas transnacionais ‘ Galeuropa’, así como do programa de garantía xuvenil de empregabilidade para a mocidade e dos proxectos Erasmus + do Servizo de Voluntariado Europeo. A técnico da Área de Orientación e Inserción Laboral do campus de Lugo da USC, Gloria Cruz, e o coordinador do Centro de Linguas Modernas da USC na sede universitaria luguesa, Manuel Fernández, completan a relación de relatores convidados a este foro, no que tamén participou como relatora Carmen Santalla, conselleira da Rede de Servizos de Empleo en Europa (Eures). A Dirección Xeral de Xuventude, Participación e Voluntariado tamén estivo presente na organización desta xornada coa instalación dunha carpa informativa na entrada da Biblioteca Intercentros, onde todas as persoas interesadas tiveron a ocasión de recoller diverso material informativo.