Ir o contido principal

As xornadas 'Mulleres ConFormando a Ciencia' botan o peche coa presentación de experiencias desenvolvidas en centros de ensino medio e nas universidades galegas

A presentación de experiencias desenvoltas en centros de ensino medio e en universidades galegas será a derradeira etapa das xornadas ‘Mulleres ConFormando a Ciencia’, este martes 16 no Instituto Rosalía de Castro. A sesión comezará ás 17:00 horas da man das profesoras de ensino secundario Matilde Ríos e Rosario García-Echave.
Xunta a elas, tamén participarán a estudante de Bioloxía Sara Bernárdez Noya, primeiro premio na área de Ciencias da Terra e da Vida no ‘Certame de Novos Investigadores 2008’, e a licenciada en Matemáticas e estudante do máster de Enxeñaría matemática Ana Gómez González, gañadora da Olimpíada de Matemáticas en 2003. Como colofón, presentaranse os obradoiros sobre mulleres matemáticas na historia e no teatro, cunha pequena representación dun fragmento da obra ‘Voces desde el pozo’ dedicada á matemática e astrónoma Carolina Herschel.
‘Mulleres ConFormando a Ciencia’ é unha iniciativa da Unidade de Muller e Ciencia de Galicia e a Facultade de Matemáticas desenvolta ao longo deste mes de decembro e dirixidas a docentes de ensino medio, persoal docente e investigador da USC e estudantes de Matemáticas, Física, Bioloxía, Química, Enxeñarías Química e Técnica de Informática de Sistemas e Educación Social.
As xornadas están organizadas polas profesoras da USC Josefina Ling Ling, membro do Proxecto ‘Ela é unha Astrónoma’ do Ano Internacional da Astronomía 2009; M. Elena Vázquez Abal, da Comisión Mujeres y matemáticas da Real Sociedad Matemática Española; e M. Elena Vázquez Cendón, presidenta da Comisión de Educación e Promoción Científica da Unidade de Muller e Ciencia de Galicia.

Os contidos desta páxina actualizáronse o 15.12.2008.